HUNGARIA PERICLITANS,

Inclytum suum ducem et Patronum benignum
S. B. C. deflet.

Ortus & Occasus crudelia bella minantur
    Nescio visceribus parcere & Ipsa meis.
Sangvine terra tepet, labuntur sangvine rivi;
    (Infandum) passim sangvine tecta rubent.
Hoc viduata Duce inter tot discrimina fido;
    Quo mea convertam lumina? quemve sequar?
Hoc solum superest coelos qui dirigis altos,
    Ad te ut convertam lumina teque sequar.
Tu meus esto Pater cui nemo resistere novit;
    Cujus & in forti sceptra superba manu.
Te duce terga dabit qui jam victricia jactat
    Arma, & partitur rura, laresque meos.
Interea optatam STEPHANO largire quietem;
    Haeredem & multos fac superesse dies.

EPITAPHIUM EIUSDEM.

Omnes si possunt Charites concurrere in unum:
Hoc saxo Stephanus Bathori recubans fuit ille.

Emericus A. Sz. Uyfalvius.